Nimin June 21, 2024 zing dar 10:00 am khan Ajit Sinha, Joint Secretary, Ministry of Home Affairs chuan Mizoram House ah Chief Minister hi a hmu a. Ani hi Cyclone Remal in Mizorama chhiatna hrang hrang a thlen te zirchiang tura MHA in Mizorama an tirh Team hotu ber a ni. Chief Minister nen hian chhiatna thleng chungchang leh hmalak zui dan tur te an sawi dun.

Dar 11:00 ah Kiren Rijiju, Minister, Parliamentary Affairs and Minority Affairs chu a office Chief Minister hian a hmu a, inkawmna hun tha tak an nei. Mizoram mamawh hrang hrang te a thlen a, Pu Kiren Rijiju chuan PMJVK hnuaia Project hrang hrang 65 te chu a theih anga tihhlawhtlinsak ngei a lo tiam a ni. Project pending mek leh Project thar chungchangte pawh an sawidun.

Chief Minister hian Kiren Rijiju chu Parliamentary Affairs Minister a nihna angin Mizoram atanga Lok Sabha MP awmchhun Richard Vanlalhmangaiha chu NDA ni lo, INDIA pawh ni lo tana thutna tur lo ngaihtuahsak turin a ngen a. Mizoram MP hi House chhunga thusawina hun tam thei ang ber pe turin a ngensak bawk. He ngenna hi Union Minister hian bawhzuisak a lo tiam a ni.

Dar 12:30 ah Jyotiraditya Scindia, Minister of DoNER and Minister of Comminications chu a office ah a va hmu leh bawk a. Jyotiraditya Scindia pa, Madhavrao Scindia hi Central Minister a nih lai vel khan Mizoram Chief Minister Lalduhoma nen hian thian tha tak an ni a. A pa thian hlui anih angin Jyotiraditya pawh hian Chief Minister hi a lo ngaina hle. Mizoram hmasawnna atan inkawmna hun tha tak an hmang a ni. 

DoNER Minister hian Mizoram in NEC kaltlanga sum a hmuh thin chu tihpun a lo intiam a. NESIDS OTRI hi Mizoram mila guideline her danglam a lo remti bawk. Externally Aided Project (EAP) hnuaia Mizoramin sum a hmuh thin leh hemi kawnga harsatna te lo enfel a intiam a. Forest Clearance hmuh theihloh avanga project pending thin chungchang te, NEC thuneihna tlahniam zel chu veiawm an tih thu te an sawi dun a ni.

Chawhnu dar 2:00 ah JP Nadda, Minister of Health and Minister of Chemicals and Fertilizers chu a office ah a hmu leh a. Union Health Minister hian Zoram Medical College (ZMC) tana Special Package dilna thehluh tawh atanga 1st Installment, Rs 170 Crore pek chhuah thuai anih tur thu a lo hrilh a. ZMC tihchangtlun zel dan tur leh Health Sector a Mizoram hmasawn dan tur kawng hrang hrang an sawidun bawk a ni.

Dar 3:30 ah Dr S Jaishankar, External Affairs Minister chu a office ah a hmu a. An pahnih chauha inkawmfalna hun neiin thu pawimawh tak tak an sawi dun. Mizoram leh a chhehvel politics inlumlet dan te ngun takin an sawi dun a, Chief Minister hi hemi thuah hian mawhphurhna lian tak pek mek a ni.

Tlai dar 4:00 ah Pabitra Margherita, Minister of State for External Affairs and Textiles nen a office ah inkawmna hun tha tak an nei a. Inpawh takin Mizoram hmasawnna tur kawng hrang hrang a sawipui.

Dar 4:30 ah Ajay Kumar Bhalla, Home Secretary chu a pisa ah a hmu a. Home Secretary chuan Cyclone Remal avanga Mizoramin chhiatna hrang hrang a tawrh a chhawmdawlna tur Rs 21.64 Crore chu SDRF hnuaiah pekchhuah a nih tawh thu leh 2nd Installment pek chhuah thuai anih tur thu a lo hrilh. Mizoramin Security Related Expenditure (SRE) hnuaia sum a dawn ve ngailoh chungchang pawh CM hian a sawichhuak a, Home Secretary hian bawhzui a lo intiam a ni. Raltlan enkawlna tura mamawh hrang hrangte leh chhawmdawlna pek tur te a thlen bawk a, Home Secretary hian an bawhzui tur thu a lo hrilh a ni.

Dar 6:15 ah Ajit Doval, National Security Adviser nen a chenna inah inkawmna hun tha tak an nei a. Indian Army hnuaia Mizo Scout Battalion din chungchang te a sawipui a, Myanmar ram buai chungchang leh hmalak zel dan tur te an sawi dun bawk.

Vawiin tlai vek khan NDA sorkar a Christian Minister awm chhun, George Kurian, Union Minister State for Fisheries, Animal Husbandry & Dairying, Minority Affairs, etc., chu a chennaah a tlawh a. Lawmpuina pein  inkawmna hun tha tak an nei dun.

Chief Minister hi Richard Vanlalhmangaiha, MP,  Vanlaldina Fanai, Commissioner & Secretary to CM, Jonathan Lalremruata, OSD to CM leh Additional PS ten an tawiawm thin a ni.